في الحلقة دي، علاء مستضيف أقرب البودكاستات المجاورة لقلبه

شباب اشتري مني في صالون كفاية بقى،

قرروا يفتحوا الدفاتر القديمة… دفاتر الطفولة! و المراهقة و أيام الشقاوة اللي بجد

حلقة كلها فضايح و كانت هتتمنع من العرض بس ربنا ستر لو فاكر إن طفولتك كانت بريئة، اسمع الحلقة دي… يمكن تفتكر حاجات كنت دفنتها من سنين.

في حلقة خاصة جدًا، علاء بيقرأ وبيعلّق على مواقف حقيقية جت منكم سواء كنتم ضحايا خدمة العملاء… أو أبطالها! من مكالمات عبثية، لطلبات غريبة، وردود أغرب دي حلقة هنفهم فيها إن الشكوى مش بس لربنا… دي كمان لموظف مش طايق يسمعنا.

حلقة كلها فضفضة، ضحك، وتقدير حقيقي لكل حد اشتغل في الكول سنتر وطلع منه سليم!

في حلقة مفيهاش أي مجاملة، سيف زهران ضيف على صالون كفاية بقى، وبيكتشف معانا مفهوم "التعر**" الكلمة اللي كلنا بنقولها، بس قليل اللي بيواجه حقيقتها. سيف كالعادة بيشوف الدنيا من زاوية تضحّكك وتعيطك في نفس الوقت من القهر. حلقة كلها سخرية، فضايح مبطّنة، وأسئلة محدش بيحب يجاوب عليها. لو تعبان من كتر التعر** اللي بتشوفه في حياتك يبقى الحلقة دي ليك

في حلقة "خط اللانهاية"، علاء بيتكلم عن الماراثون الطويل بتاع الحياة… كل ما تخلص حاجة، تلاقي اللي بعدها طابور، وكل ما تقول "كده تمام"، يردوا عليك بـ"طب ناقص بس...".

من أول الشغل، للدراسة، للجواز، للطلبات اللي بتنزل عليك في آخر لحظة و ملهاش نهاية.

لو إنت من الناس اللي بتقول "أنا خلصت خلاص"، اسمع الحلقة دي… يمكن تكتشف إنك لسه في أول السطر.

في حلقة من العيار التقيل، مي سلامة بتحكي لنا عن حفلة العرسان اللي عدّوا عليها…

من النصاب اللي فاكر نفسه أذكى واحد في الدنيا، للأمريكاني اللي عايش في مصر ومش فاهم أي حاجة،

لللي اول ما هي رفضته قالها ظبطيني مع واحدة تانية

ضحك، استغراب، وقصص أغرب من الخيال، بس حقيقية جدًا!

هو الجواز بقى مشروع اقتصادي؟ طب ليه العروسة عايزة شبكة في حجم عربية؟

وليه العريس محتاج معجزة عشان يعرف يتجوز؟

في الحلقة دي، علاء بيتكلم بصوت كل شاب حاسس إن الجواز بقى صفقة خسرانة.

كلام جد، بس بطريقته زي ما اتعودنا

ساخر، صريح، و حقيقي و يمكن شوية جد المرة دي

لو بتفكر تتجوز، اسمع قبل ما تطلع على المأذون.

في حلقة النهاردة، بنتكلم عن المكملات، وبنفك شفرة الـ"لايفستايل" اللي قالب علينا السوشيال ميديا. ضيفنا كريم جبرائيل، الكوتش اللي هيعملك بلان أكل ملوش طعم أوي بس صحي. بنحكي عن أغرب مواقف الچيم، أنواع الناس اللي بتقابلها هناك، وليه دايمًا في واحد بيزعق و هو بيتمرن.

لو بتدخل الچيم علشان تتصور، أو بتروح تلحق الفورمة قبل سيزون الساحل !! .. الحلقة دي ليك.

في الحلقة دي، بنحكي عن مغامرات استخراج الڤيزا ، والكوارث اللي بتحصل قبل معاد بوردينج الطيارة، والطاووس إللي بيظهر في أي مكان !!!

تابع الحلقة عشان تفهم إيه موضوع الطاووس دة